學術 2019-03-16

2019DSE 最後衝刺

作者: 讀魔 (#536 導師, 就讀HKU Government Law)

 

 

 

 

DSE殺到, 相信咁多位同學平時都已經聽埋唔少考試絕技, 但大家係咪唔知點解聽極都好似冇進步,甚至陷入咗樽頸位呢?正所謂: “失敗乃成功之母”, 我哋不妨可以由一個角度思考一下, 點樣先至可以DSE嗰度考得「有咁差得咁差呢」?

 

(小編只不過用反語嘅方法, 去向大家講解點樣可以考得好。當然亦都唔相信會有人以為我真係想教大家點樣考得差啦!)

 

溫習篇

大包圍

-- 沉迷溫次要嘅部分,等同倒時間落海

 

 

 

依家已經係3月中,離筆試開始只有半個月時間 ,只要認真計一計, 你就會發覺你嘅時間,精力將會越嚟越少, 而時間同精力係確保你可以長期作戰嘅最重要資源。

 

所以為咗要考衰DSE你就要盡情浪費你嘅資源, 你要完全視自己的情況, 明明已經好熟悉嘅內容就要用更多既時間去溫習; 明明唔太重要嘅地方就要浪費精力去盲目惡補; 迫切同埋可以短時間內進步嘅部分(如中英文paper 3)就要徹底無視, 咁樣先至可以好似用咗好多時間溫書, 其實浪費曬啲心機。

 

呢一招仲有一個進階版本, 就係無視學系要求. 唔少科目本身已經有weighting呢個制度令你需要集中火力喺有得加分嘅科目上面依家HKU, CUHK仲推出咗5, 5*, 5**嘅加分制, 如果你唔想入大學就一定要無視佢哋嘅遊戲規則!

 

人做乜我做乜

-- 每個人都有自己嘅強弱, 唔可以一味copy and paste

 


 

 

每個人都一定有優點同缺點, 幾叻嘅同學都唔會係例外。所以佢哋溫習嘅時候, 會按自己嘅情況去設計策略,例如比較需要有規律去溫習嘅同學,會花多啲時間設計清晰嘅筆記;比較需要實戰經驗嘅同學,就會報多啲模擬試、操卷同埋睇吓自己嘅答案有乜嘢可以做好啲。而坊間絕大部分嘅建議往往比較概括, 如果唔經過思考嘅話,係唔會搵到配合到自己既方法。

 

所以如果要考衰DSE嘅話, 就一定要東抄一忽, 西抄一忽, 一邊學人喪操past paper, 一邊學人花好多時間去整理筆記, 唔好畀自己有統一清晰嘅溫書策略, 唔好思考點解人哋會咁做同埋自己嘅情況,咁就可以事倍功半!

 

心態篇

盲目自信

-- 訂立目標 唔好太過有自信

 

 

正如頭先所講, 時間已經冇多,大家嘅精力有限, 根本冇時間去就住所有科目作出根本性嘅改善。如果過分散投資嘅話, 只會弄巧反拙, 冇辦法加強任何科目嘅基礎知識或者操熟應試技巧。

所以如果要考衰DSE嘅話, 一定要過度相信自己嘅能力、唔好訂立可行嘅溫習目標、唔好腳踏實地、唔好按照自己能力範圍內做到嘅嘢去做, 樣樣都要做到所謂嘅「最好」, 咁樣就會到頭來得個桔 !

 

過份悲觀

-- 自我實現預言

 

 

唔知大家有冇聽過自我實現預言呢?呢個預言係指人嘅思考可以影響自己嘅行為及心態,進而影響事情嘅發展 一個時常諗住自己會失敗嘅人往往會陷入長期嘅焦慮同恐慌, 冇辦法令你集中思考解決方法, 最終會令到自己好似預言一樣失敗!

 

溫書時咁嘅情況都有機會出現, 例如你有一個topic唔識, 如果你成日諗住自己考試嘅時候會唔識做,會失晒分,而唔係冷靜咁解決呢個問題, 最終解決唔到問題不得止, 仲會影響到你臨場嘅發揮!

 

所以如果想考得差嘅話,就記住要猛咁諗自己會考得有幾差,千祈唔好客觀、理性咁諗辦法去解決啦!

 

臨場篇                                                     

求其睇題目

--唔好貪快 認真睇清楚題目重點 

 

 

 

係考試嘅時候睇錯題目嗰個分分鐘係你嚟㗎! 點解?考試期間, 時間又唔夠,氣氛又緊張, 好難保持細心, 所以如果你對條題目嘅要求、用詞、文章嘅行文語氣等等睇得粗疏嘅話, 你寫出嚟嘅答案可能等於冇答過佢嗰條問題,甚至有機會一分都攞唔到!

 

所以如果真係想考得差嘅話, 就一定要求求其其咁睇條題目, 唔好睇多幾次, 唔好highlight啲重點, 同埋唔好答完題目之後翻睇自己有冇扣題啦!

 

冇做好準備

-- 未睇?仲唔快啲睇?

 

 

呢度講緊嘅唔係講你溫咗幾多書, 準備咗幾多技巧, 而係講考試其他方面嘅細節。

 

大家千祈唔好以為呢啲係人哋浪費時間嘅嘢, 因為如果做得唔好嘅話, 你溫咗幾多書、做咗幾多份卷但就因為呢啲無謂嘅事情畀人扣分, 又或者搞到遲到, 考試嘅表現大打折扣, 得不償失!

 

如果想考得衰嘅話就一定要:唔好睇熟考生指引、唔好搞清楚到底考試場地喺邊度、唔好檢查文具同埋相關嘅文件(例如准考證)齊唔齊, 唔好預留足夠嘅時間去考試場地同現金畀自己飛的、唔好睇清楚考試異樣嘅處理程序、同埋唔好同家長講清楚做乜嘢會累到自己俾考評局調查。(真人真事:有考生家長擺咗部著嘅手機響佢書包, 畀考評局發現咗)

 

預備考試係一門藝術;溫習、心態、臨場發揮三樣都唔可以缺少。至於點樣配合三點去影響你考試嘅表現, 同埋唔同科目嘅答題技巧, 有機會嘅話就再分享。

 

(此文章純屬 Blogger 個人分享,並不代表本網誌立場)

 

想搵一位合適嘅私補老師?

 

補習可能係最好嘅Part time

 

緊貼Tutorland BlogInstagram & Facebook

搵補習,要搵,就要搵最好!

Choose Smarter, Go Further!