學術 2020-07-02

三個溫習記憶技巧

作者: 曦 (#1445 導師)

 

記憶力差?你需要知道的三個增強大腦記憶力的溫習方法

 

有冇覺得有時背野溫書好吃力,覺得太多嘢背,根本溫唔入腦?明明好努力溫書 但成績未如理想?快啲學吓以下呢啲方法啦!全部小編親證有效架~



1.回想法

唔知上堂老師講嘢係咪不斷聽隻手不斷喺度抄筆記呢?有時抄抄下仲會抄唔切,錯過咗一啲內容,最後睇返筆記又唔明白?呢個方法好簡單。就係上堂嗰陣專心上唔好抄筆記,上完堂之後,回想返嗰一堂大約講咗啲咩內容再寫低 一開頭可能淨係記到兩成,但係你keep住每堂咁樣記,就會越記越多,上堂會越嚟越專心,要溫書嗰陣持續記憶力都變得更加長!呢種方法都可以套落溫書嗰度,當你溫完一課,就可以即刻回想返啱啱溫完嘅大致內容,咁樣就可以加深腦部嘅記憶。同樣,可能第一次記會記唔曬,臨瞓前或者隔咗一日之後可以再回想返温習內容。每次溫書都用同樣方法,不斷回想嘅讀書內容就會好容易記入腦中,依家即刻嚟試吓啦!



2.物件法

首先,搵一個十分之熟悉嘅地方(例:客廳),瞌埋眼都記得大概擺設。然後,找10-20個地方順序記起來(例:門,垃圾桶,鞋櫃....)記住,要跟據自己熟悉地方嘅順序。之後,將要記嘅10-20個重點用誇張方法套落去(例:第一樣要記嘅係筆,將佢套落門:我將筆拋向門,門被筆刺穿,最後碎裂)用誇張方法可以令自己記憶更深刻,將這些套落自己熟悉嘅地方,加以運用,就可以10分鐘內記30, 甚至50個重點。曾經有人用此方法10分鐘記住整副撲克牌嘅順序。數字連樣式都記得清清楚楚,一絲不漏。因為一開始用非常熟悉嘅環境做基礎,所以唔使擔心會搞亂順序或者漏咗重點。但呢個方法都要練習同温書,當你呢個方法練習得越多同溫習內容複習次數越多,對方法嘅運用以及溫習嘅內容就會越純熟同埋越牢靠。不同嘅科目可以用不同嘅地方以作區分。試吓,呢個方法一定幫到你!



3.蕃茄溫習法

呢個方法係分配時間以達到最佳效果。有調查顯示人最佳記憶同專注時間係25分鐘,超過呢個事段大腦專注力會下降,容易被事物打擾,記憶效率會降低,這個時候如果選擇持續温習可能會事倍功半,達不到最好嘅溫書效率,甚至因為效果不好以及遙遙無期的温習而打擊動力,所以温習25分鐘之後需要休息5分鐘。如果把握25分鐘後的5分鐘休息,效果會截然不同。唔好睇小這小小的5分鐘,這黃金5分鐘可以為身體充電,加深之前25分鐘嘅記憶,令下一個25分鐘更專注,同時亦都令大腦可以適當地休息。每4個番茄鐘後休息15-30分鐘。但休息入面要好好控制時間,唔好只貪戀休息嘅時光而浪廢溫書嘅時間,可能係做伸展嘅動作或者看一看手機放鬆一下,不過不能過量,否則就會錯失寶貴嘅溫書時間。如果自制力比較差,可以調較鬧鐘提醒自己,一齊為考試努力!

 

要令溫書效率加快,就要尋找最適合自己嘅方法,一味只係死記硬背,只會令自己失去溫書的動力,弄巧反拙。以上嘅方法只係一些幫助溫書嘅技巧,並不代表運用一次就可以牢記係腦度,需要嘅都係自己嘅努力,不能一步登天。

 

(此文章純屬 Blogger 個人分享,並不代表本網誌立場)

  

想搵一位合適嘅私補老師?

 

補習可能係最好嘅Part time

 

緊貼Tutorland BlogInstagram & Facebook

搵補習,要搵,就要搵最好!

Choose Smarter, Go Further!